ജാഡ യാത്ര

▮അസ്‌ലം ഉള്ളാട്ട്

ഉടല് വെന്ത് നിണം  കിനിയുന്ന

പഴകിയ തെരുവിലൂടെയൊരു

ജനാധിപത്യം

വേച്ചുവേച്ച് നടക്കുന്നു.....

മനം മടുത്തു, ഞരമ്പ് മുറിച്ച്

രക്തമകിരം വാർന്നു തീർന്നിട്ടും 

മരിക്കാനാവാതെ

പിടഞ്ഞു പിടഞ്ഞൊരു, ജനാധിപത്യം 

വാഗ്ദാനങ്ങളുടെ ആർത്തവം

മോന്തി കുടിച്ച് കവിള് ചീർത്തൊരു

ഏകാധിപത്യമവിടെ കിടപ്പുണ്ട്;

കണ്ണിൽ തിളക്കമുണ്ട്, കാതിൽ കടുക്കൻ ഉണ്ട്

ഖൽബിൽ ജീർണതയും 

തെരുവെന്തൊരു സമ്പന്നം!

അഴുക്ക് ചാലുകളുണ്ട്. അതിൽ;

ലഹരിയുറക്കിയ യുവതയുണ്ട്.

ബലിക്കല്ലുമുണ്ട്. അതിൽ;

പാർട്ടി പടച്ച രക്തസാക്ഷികളുണ്ട്. 

ഗസ്റ്റ് ഹൌസുണ്ട്. അതിൽ;

 മന്ത്രിയുടെ ഡിങ്കോൾഫിയുണ്ട്.

അരമനയുണ്ടതിൽ,

ചത്തു വീർത്തൊരു

നീതിയുണ്ട്

എല്ലാമുള്ളൊരു തെരുവിൽ

കണ്ണുകളില്ലാത്ത ജനാധിപത്യം

ചുമ്മാ അലഞ്ഞു നടക്കുന്നു.

കാലു തെന്നി മുഖമടച്ചു വീഴുന്നു.

കവിളിലെ മണ്ണ് തട്ടി നീക്കി

വീണ്ടും നടക്കുന്നു, നാട് കാണാൻ.