എല്ലാം ശരിയാകില്ല

▮ശിബ്‌ലി അമ്പലവൻ

വടിവാളുകൾ മനുഷ്യത്വം പാടി നടന്നു ....

വീറോടെ ചിന്തിയ രക്തത്തിലും രേത-

സ്സിലുമായി നീതിബോധം

തളംകെട്ടിക്കിടന്നു .

അഴിഞ്ഞ കോന്തലക്കിടയിൽ നിന്ന്

സദാചാര ബുർഖ ഊർന്നിറങ്ങി .

പഴയ കണ്ണടകൾക്ക് തിമിരം കയറി,

ചൈനാകണ്ണടകൾക്ക് വിപണിയിലിറങ്ങി .

ലോകം മാറി കോലം മാറി ,

മലയാളി മാത്രം മൂടിപ്പുതച്ചുറങ്ങി .

വട്ടത്തിലുള്ള ത്രികോണവുമായി ബൊളീവിയൻ കാട്ടിലെ

കഞ്ചാവ് തേടി ,

ചരിത്രംമൂടിയ ഖബർ തുരന്ന് സ്വയം

അതിലേക്ക് എടുത്ത്ചാടി .

മദവും മതവുമില്ലാ കുഴിയാനകൾ

പച്ചപ്പുല്ലിൽ മേഞ്ഞ് നടന്നു .

വിഷമഴ പെയ്തു ,വിരകൾ വളർന്നു

ഇന്നോവക്കാറുകൾ വഴിയിൽ നിറഞ്ഞു

ഖബ്റിനുള്ളിലെ രക്തസാക്ഷികൾ ഉറക്കെയുറക്കെ

പൊട്ടിച്ചിരിച്ചു .