ആൽത്തറക്കിപ്പുറം

▮ശിബ്‌ലി അമ്പലവൻ

പായസം മോന്തി വയർ നിറഞ്ഞ
പൂജാരിമാർ മെല്ലെ കുമ്പ തടവി
കവിത നിറഞ്ഞ ഭക്ത മിഴികൾ
പട്ടിണി മെല്ലെ പമ്പ കയറി
മരണം കാത്തുകിടന്നു മാലാഖമാർ
ശരണം വിളിയിൽ മയങ്ങിക്കിടന്നു
പല്ലിൽ കുത്തിക്കിടന്ന വാക്കുകൾ
അരച്ചുകലക്കി ചിലർ ശ്ലോകം മെനഞ്ഞു
പൂണൂലിലൂടെ മദ്യമൊഴുകി
എച്ചില്പാത്രത്തിൽ ഈച്ചകളാർത്തു
കഞ്ഞി കുടിക്കാൻ വകയില്ലാ പാവങ്ങൾ
ഭണ്ടാരപ്പെട്ടി നിറക്കാൻ ശ്രമിക്കുന്നു
ഓംകാര വിളിയിൽ തേങ്ങൽ പടർന്നപ്പോൾ
അമ്പലപ്രാവുകൾ പാറിയകന്നു
ദൈവത്തെ മൂന്ന് കണ്ണ് കൊണ്ടും തിരഞ്ഞ്
പച്ചത്തേങ്ങകൾ പൊട്ടിത്തെറിച്ചു
പട്ടിണിപ്പാവങ്ങൾ ഉച്ചവെയിലിൽ
സ്വർണ കവാടത്തിലൂടെ കടന്നു
അമ്പലം മുഴുവൻ ചുറ്റിക്കറങ്ങിയ ഭക്തന്റെ
ഊശാന്താടിയിൽ ചോര കനത്തു
കാണാത്ത ദൈവത്തെ കബളിപ്പിക്കുവാനായി ചിലർ
തറ്റുടുക്കുന്നു കവിടി നിരത്തുന്നു..
ഏലസുകളൂതുന്നു , ഭക്ഷിണ വാങ്ങുന്നു
എല്ലാംചെയ്തിട്ട ഉറക്കെ പറഞ്ഞു:
ദൈവമേ നീയെത്ര കരുണാമയൻ !